香港開始踏入由春轉夏，天氣就好似成日陰沉不定，我同你嘅關係亦都一樣，好多時都會落雨，雷雨，紅雨，黑雨，我哋嘅關係不斷係咁出現唔同嘅問題。

我對於愛情，其實係一個好傻嘅人，並唔會用腦，之前你所講嘅「靜」、「朋友」，喺你嘅眼中係一種轉換，去放鬆。但係喺我嘅眼中，就真係好似成個天跌咗落嚟咁，你就係我嘅天。

由我收到你嘅決定開始，我真係每一日都接近冇瞓過好覺，每一晚瞓着嘅時候都係朝頭早，每晚都會偷偷飲泣，不斷偷望你有冇上線，無時無刻都好想收到你嘅訊息。

終於有一日，我鼓起勇氣去問，你可以以伴侶嘅身份去觀看我嘅演出嗎？我係處於思想交戰入邊，理性話俾我聽，我需要尊重你嘅決定，但係我心裏面真係好想你可以用伴侶嘅身份出席。

而當日我換來嘅答覆就係，你會出席，但係只以朋友嘅身份，我真係心痛到極點。難道我真係希望你可以用一個伴侶嘅身份去聆聽我嘅演出呢一個要求都真係咁過分？我都真係咁唔值得？

我真係歇斯底里咁樣去同你去講出：「我哋嘅關係係連朋友都不如」。

叫我換來嘅，就係心痛。我真的受傷了。

由 馬騮仔