好多人都話，只要專心去做好一樣嘢，就算嗰樣嘢係再簡單，你都可以成為一個專業。

今日一朝早身體好返啲啦，今日終於要見客人啦，佢要我朝頭早即刻去做presentation介紹一下幫佢整嘅系統俾啲員工聽。

臨急臨忙，準備咗啲PowerPoint，完全冇諗過點講㗎，系統又唔係我做出嚟㗎喎。（而家有幾多系統係經人手去做啊？全部都係用AI 㗎嘛。） 我係連個PowerPoint都係AI幫我準備㗎，去到嘅時候好彩本身都唔係咁怕羞嘅人，講解得佢哋都明白，亦都有好正面嘅feedback，開心㗎，但係其實最開心嗰樣嘢並唔係呢樣喎，係啲乜，就係我可以同你一齊食餐午餐。

雖然個時間好短，相處嘅時間亦都係好短，但係原來對於我嚟講，每日見一見你，我就已經好開心。

既然出得街，梗係處理晒所有要出街嘅嘢啦，之後我就返咗去繼續開工做嘢，我發現到原來近期專心做嘢，佢做好每一件事情，回報自然就會出現。專心做一件事情，就算見事情再簡單，但係只要將件事情做得熟、做得足，呢樣嘢就會變為你嘅專業。

我成日都用腦去諗一啲天馬行空嘅嘢，當然所有嘢都係同錢去掛鉤嘅，冇辦法，生活就係要錢！我無時無刻都有好多唔同嘅諗法，究竟我點樣可以將佢一日實現呢？ 原來我比別人更加優勝，我除咗有諗法之外，我仲會不斷實踐，我唔介意我嘅實踐係白費氣力，但係我相信總會有一個係可以幫我做到我想要嘅嘢。

我知道你都好埋頭苦幹去做嘢，我亦都相信你係可以做得到你自己想做嘅嘢㗎，加油啊。親愛的。

By 馬騮仔