2026-05-13

對不起！對不起！對不起！

好明顯呢一個係道歉文章啊，12號嗰日，我發現到呢樣嘢，原來可能有方法可以用到Claude Desktop，但係唔需要Subscribe個服務。我不停係咁鑽研，去到凌晨3:00，但係都仲未諗到點整，點解我咁投入？ 我並唔係想慳嗰少少錢，我覺得有需要用嘅嘢係要俾錢去用，但係呢個服務係你需要㗎，我希望可以減少你嘅開支，所以我搏晒命係咁整，點知出事啦。。。

第二朝早，本身諗住同你食個晏晝，喺文字上面溝通上有錯誤，大家對於對方嘅文字都有誤解，最後出現咗兩個極端，一個係由我朝頭早就陪你，一個就係晏晝食飯先至搵你，但係我覺得問題並唔係呢度，問題係我接近昏迷不醒，去到12點幾先至起到身。本身約咗你食晏晝，但係我已經出唔切嚟，對於你嚟講，我確實係做唔到我對你嘅承諾，對唔住。

其實我真係好期望，大家可以接受到對方所有嘅表達方式，不論係你嘅認真，我嘅鳩噏，每個人都有唔同，我哋唔應該有存在唔啱聽就唔好聽嘅時候，學習吓互相去接納，互相去聆聽，因為我覺得有一樣嘢就係，對方有呢種表達方式，一定有原因，並唔可以因為唔適合自己，以討厭對方嘅表達方式，因為呢一個係你，因為呢一個係我，我相信其他人嘅話，我哋係可以用討厭、左耳入右耳出、眼不見為乾淨呢D方法去應對，但係我同你，我覺得我哋需要更加多嘅相處同埋溝通。

可能我同你互相都覺得我哋好清楚對方，可能我同你互相都覺得對方好明白自己，就係呢一啲可能性，同埋不可抗力嘅時間因素，我哋溝通嘅方式開始出現咗啲問題。我哋將來一定為溝通得好好，因為我深信，我哋兩個都係咁互相愛對方，並唔係咁小嘅問題就可以阻礙到我哋。

請原諒我。