Gary 分享上體驗式課程的感受，感恩身邊最重要的人，學習用心表達感受。

今日係我上最後一階嘅課程嘅第一堂，今階嘅課堂全部都係體驗式課程，我知道我係有恐懼㗎，點解？一個IT program佬，做任何嘢都有邏輯，唔係if就係then，唔係then就係else，所有嘢都有得去規劃，所有嘢都有得去計算，但係偏偏當要用到心去表達感受，往往就係我哋嘅呢一行嘅弱項。長期處於邏輯關係嘅人，會慢慢忘記咗點樣去表達自己嘅感受，我係一個過來人。

我要感恩，我生命中最重要嘅人為我而出現。 我要感恩，呢個人介紹咗我去尋找返我個心。 我要感恩，我開始明白到點樣去用心去溝通。 我要感恩，你為我帶嚟遺忘已久嘅被愛感覺。 我要感恩，你喺我有生之年之中出現並遇上。 我要感恩，你為我不斷咁付出真心同埋關懷。

人生之中，喺茫茫人海之中，兩個相愛嘅人可以相遇，其實係好困難。 有好多人，窮一生嘅精力，都未必可以搵到一個相愛嘅人，雖然我哋相遇嘅時間、地點都有偏差，並唔係一個最適合嘅時間出現，但係原來，當機會出現咗嘅時候，兩個人都同時間一齊捉緊對方，呢樣嘢先係最重要。

雖然，我哋有機會會因此而出現更加多唔同嘅困難，但係呢啲所謂嘅困難，只不過係你或者我去定義位阻礙我哋嘅諗法，其實係有辦法去一一咁樣去衝破。

我好高興，我上完堂之後，立即同你毫無保留咁樣去分享感受，我知道你會好喜歡我分享俾你知，而我一直都相信，我對你嘅係愛，而並唔係喜歡。而我亦都清清楚楚咁樣去感受到你對我嘅愛。

將來嘅事，自然係會有唔同嘅障礙、困難去要我哋去面對，但願呢一啲嘅障礙會成為我同你嘅人生色彩，我哋一齊去完成呢一幅畫作，共同建立我哋嘅將來吧。

無論將來我哋幾時先至可以喺埋一齊，對於我哋嚟講，只要我哋真心咁樣分享俾對方知道，無論遇到乜嘢問題，我相信我哋都可以共同面對、共同闖過。

「I Really really love u！」