經過肚痛嘅折磨，我今日都係繼續痛㗎，但係我好開心呀，你一朝早喺你百忙之中都為我送上一支寶礦力，我開心到喊，雖然我已經出出入入去廁所去到冇晒力，但係我都好想可以見到你，而一朝早見到你嘅出現，我真係開心到爆。

今日真係冇乜特別㗎，都係忙住出出入入廁所啦，做一啲網站嘅搬屋準備，同埋設定一啲有關AI嘅嘢，但係當休息夠嘅時候，咁啱夾到時間可以同你食個tea，我即刻成個人精神晒，飛奔出去，你仲為我買咗藥，苦口良藥，啲藥真係幾苦吓，仲話有毒嘅添，要以毒攻毒，我心諗：「俾你毒死都係抵嘅」。

我返到去食咗啲藥之後，發現真係冇咁痛喎，睇嚟我份人真係幾毒，啱晒你口味：「正宗毒撚」。希望食晒啲藥之後就可以冇事出得關啦。

多謝你呀。