記得琴日建立呢一個blog嘅系統，就係為咗想寫低我嘅感受去比您睇。

建立完呢個系統之後，我去到好夜我都瞓唔到覺，我好掛住你，我個心拿住拿住痛，我成晚都瞓唔到，我去到凌晨五點幾先瞓，最後我都忍唔住發送一個訊息俾你，寫住「我根本就心痛掛住你都瞓唔到」

第二朝九點幾我聽唔到鬧鐘，好彩起到身，個人好攰，但係今日要去上堂，我唔可以缺席，因為我需要上齊晒所有嘅課堂，並唔係因為有得claim返錢，而係我唔想錯過呢個課堂入邊嘅內容，我想了解成個課程點樣去令人改變。

我同啲組員食咗個好快嘅早餐，天氣陰陰沉沉，同我今朝早嘅心情係一樣，但係人總係要面對即將發生嘅事，我懷着一個疲倦、毫無狀態嘅心情去上堂，喺上堂之前我收到你嘅訊息，我感受到你嘅憤怒、矛盾、仲有對我嘅愛，我好想一一咁樣去回覆，但係其實我知道我嘅回覆未必可以表達到我嘅真實諗法，同時我亦都知道，你嘅憤怒係情緒上面嘅宣洩，你需要有地方釋放，如果你錯誤理解我回覆，我相信情況會更糟糕，正當我諗住點樣回覆嘅時候，上堂開始啦，今堂要收起電話，我即刻回覆咗一句：「上堂，要收電話」，我就投入落去上堂啦。

今日上堂係講心㗎，對於一個用腦嘅我嚟講，本身係一件好困難嘅堂嚟㗎，但係因為當我以為自己瞓得唔夠，狀態唔好嘅時候，亦都係正正呢一個時候，我個腦冇得再運作，我用心去聆聽課堂嘅內容。

課堂入邊咁啱有個組員需要一個爸爸嘅角色，我自己舉手想做呢一個角色，真係唔知點解，我出到去企喺度，乜嘢都冇做過，只係企喺個組員面前，老師問咗組員有啲乜嘢感受嘅時候，組員嘅回答觸碰到我身為一個爸爸，一個好少見到自己個仔嘅爸爸嘅感受。我好傷心，我嘅眼淚開始不停咁樣去流出嚟，好多組員都好驚訝，平時嘅我成日都分析唔同嘅嘢，點解突然間會情緒爆發出嚟呢？ 返到埋位嘅時候，我都停唔到落嚟，我仲係沉醉喺傷痛入邊。

課堂最後，係一個頒獎禮，係我哋唔同組別嘅人嘅成績表。喺七個獎狀入邊，我哋獲得三個獎項，而我亦都得到最佳男主角，喺頒獎之前，我感受到唔同組員嘅支持同埋認同，但係其實我最想得到你嘅認同。最後我哋組別亦都攞到組別嘅冠軍現金獎。

課堂完結之後，我真係好想好想，好想同你用心去分享，去清晰咁表達我係明白你嘅感受，所以我要求同你傾傾過電話。呢一個電話，我覺得我哋大家都做得好好，我哋互相看重對方，我哋好願意為對方付出。

最後，我想同你講：「我支持你，我感謝您，對唔住，我愛你」