今日一朝早瞓醒，我發現尋晚我有好多工作已經安排咗，我第一件事起身就係拎起個電話，不停係咁檢查啲嘢究竟做成點，我大約九點幾起身，身為一個IT佬嘅日常就係要不停係咁做IT嘅工作，我喺張床度去解決唔同嘅問題，咁就去到10:00鬆啲。

喺呢個時間入邊，我無時無刻都喺度諗緊究竟您喺度做緊乜嘢？瞓得好唔好啦？ 有冇食到早餐啊？ 可能同個小朋友喺度玩緊？或者做緊其他嘢。

突然間我收到屋企人嘅電話，佢同我講返屋企嘅問題，問我有啲乜嘢意見，我心諗：「我記得我好耐之前都已經叫你哋要去解決呢個問題㗎啦，不過我知道講呢句都係冇用㗎，唯有專心聆聽啦！」 聽完電話入邊嘅人發表完之後，佢就叫我返屋企食飯，我自己覺得都好喎，唔好屈住喺一個咁樣嘅空間入邊，返去見吓啲屋企人都係一件好事嚟㗎，我就咁樣出咗門口啦。

好開心，我返到屋企有好豐富嘅午餐，但係我心諗其實得兩個人食咋，都唔知啲屋企人要食幾多日冷飯菜汁，諗起都心傷。我媽咪有好多壞習慣，例如佢鍾意煮定一大堆餸，咁樣方便分幾日食。又或者佢係鍾意煮完之後自己唔食，佢好識享受人生㗎，無時無刻都出去玩，今日佢就係出咗去玩啦。

由於尋晚我開工開到好夜，食完飯之後，我覺得好攰，我就返咗去自己屋企瞓覺啦，呢個時間我好enjoy，點解？ 因為您都咁啱瞓覺，嗰種感覺就好似同你一齊休息咁。

瞓醒咗之後，我有繼續開工啊，雖然我係做緊嘢，但係我都好掛住您，我唯有開住音樂，一路聽，一路做。咁樣先至可以減少我對您嘅思念。

由於我起身嘅時候都已經比較晏啦，同我一齊上堂嘅組員，佢哋想出去旺角度拉票，因為我哋有功課係需要其他人去俾心心我哋，我覺得我既然要去上堂，我就要投入去做，我出咗去幫手拉票，成績應該幾好呀，我覺得都幾開心，因為我有盡力去做。

喺拉票嘅途中，我收到您嘅訊息，其實我好唔開心，唔開心嘅位置並唔係您所寫嘅內容，而係我感受到你嘅矛盾、左右為難、係您嘅感覺同埋感受。

您好叻用文字去表達出您嘅感受，我切切實實咁樣感覺到。雖然您所寫嘅內容我唔係好認同，但係如果您決定咁樣做，您會開心快樂，冇咁傷心，您就去做啦，做您自己覺得應該要做嘅嘢。 我亦都話返俾您聽，我都會做我自己認為啱嘅嘢，我都會做我自己開心嘅嘢。

我相信：「慢慢，我哋就可以互相了解到對方嘅感覺」