Apr 6, 2026

尋晚都叫瞓得好啲，今朝早一瞓醒，你就話你要出發啦，希望你哋玩得開心啲啦，我會乖乖喺度㗎啦。

今日係出馬嘅日子，我約咗朋友入去馬場度跑馬，通常賽馬日我都會買足咁多場馬，既然要入場，我就早少少食早餐然之後就出發，我去咗小王子度食早餐突然間諗起，好耐冇同你喺度食早餐啦喎，唔單止喺度冇食，好似好耐都冇同過你相處，我真係想靜靜地咁樣同你一齊吃喝玩樂，淨係兩個人。

食完早餐我就出發去馬場，我通常都會第一場比賽前就已經入到場，頭兩三場都冇乜點中過，不過唔緊要，主力賽事並唔係頭嗰兩三場。今日運氣真係唔錯，一共影咗兩張頭馬相，我仲特登用呢兩場比賽做過關，係全部中晒呀，今日真係收穫滿滿。

如果今日你都喺我身邊就好啦，可惜呢個機會應該都好難先至會出現到，不過唔緊要啦，希望在明天，我相信總有一日可以一齊見證呢一個moment.

今日嘅賽事完咗之後，我真係攰到頂唔順啦，點解？因為要着住西裝皮鞋囉，天氣又熱啊，認真攞命，所以一完咗我就即刻落去樓下截的士，嗱嗱臨返屋企。

我一返到屋企就即刻換衫打落床，分享一下我今日嘅成果俾你聽，原來每日都分享一啲嘢係去成個人都唔同啲個喎，並唔係自我感覺良好咁簡單，而係唔會成日都覺得自己得一個人，成日都要一個人處理晒所有嘢，所以你唔好彩啦，我會keep住分享嘢俾你聽。

Love you! 睇吓今日早唔早到瞓覺先。🤭

By 馬騮仔