我唔知點解近期我都係瞓得唔係咁好，唔知關唔關你事呢？成個復活節假期，我都冇見過你呀，聽日你就去完旅行返嚟啦，我都真係想見吓你，相信正確嘅order，聽日一定可以見到你。

今朝早好早醒咗醒，我明知道自己其實係好唔夠瞓㗎，但係都係碌一陣網，睇吓抖音，漸漸地我就攰到阿媽都唔認得又瞓着覺，我冇記錯應該係瞓到大約點幾鐘，我就開始開電腦上下網。我見你send咗啲相過嚟俾我呀，我feel得到好開心呀玩得，我都戥你高興，同個女玩得咁開心。我希望你真係可以休息到啦。因為喺我心入邊，其實你真係冇乜點休息㗎，好似長期都着住副engine不停係咁行緊，有時間你真係要休息一下。

之後我就開始做吓其他無謂嘢啦，計算吓究竟我嘅投資計劃幾時回本啦，原來唔係爭好遠咋，有機會下一次就已經可以回本啦，我即刻將呢個消息分享俾你，雖然我知道你唔係聽得好明相關嘅嘢，但係我都好想話俾你聽，之後今晚又返咗去娘家食飯啦。今晚整隻九節蝦食，啲蝦熟咗之後紅到好似小龍蝦咁樣啊，不過其實佢真係幾彈牙，都幾好味，又大隻，今日我仲收到家姐嘅手信，係杏仁朱古力嚟㗎，我又可以分享俾你啦，一定要儲肥你，嘻嘻嘻嘻。

食完飯我就返咗去屋企喺度休息緊啦，轉頭可能打吓機咁就一日啦，聽日就要準備開工嘅一日啦。我哋大家一齊加油啦。

By 馬騮仔